Art 1

— 賴皮皮出來了 —

話說賴皮皮出世前一日，賴爸賴媽去咗做38週產前檢查，醫生話賴皮皮生長速度對比上一個禮拜慢咗啲，建議順產催生，等賴皮皮出世之後可以透過食奶吸收更多營養。經過一系列檢查後，醫生同賴爸賴媽就決第二日入院催生。

— 醫院環境 —

賴皮皮出世當日嘅7:00，賴爸賴媽就去到醫院，做好入院手續，入到產房就大約8:00左右，然後望住吐露港個景就開始一日嘅birth-cation。

產房嘅環境配套幾好幾靚，有一個獨立嘅廁所，有得沖涼，賴爸仲喺入邊屙咗個靚屎。仲有枱有凳有電視有插蘇，方便賴爸work from Hospital同埋賴媽煲劇。

— 催生藥 —

入到產房之後，助產士就幫賴媽換衫同幫賴媽做檢查，檢查完賴媽就煲住劇咁等打催生藥、打無痛同埋人工穿水。打催生藥、無痛同人工穿水都係由唔同嘅人負責，醫院所有人都配合都好好，令到賴媽會痛嘅時間縮到最短。例如知道麻醉科醫生因為手術關係要遲少少先到，助產士會關心賴媽情況，稍微減低催生藥份量，令到等到賴媽宮縮唔會太密；又會聯絡產科醫生，延後人工穿水嘅時間。去到差唔多時間，助產士就幫賴媽打咗催生藥，催生藥就好似吊鹽水咁係靜脈注射，而打完之後助產士亦會一直關心賴媽嘅情況。

— 無痛分娩 —

去到10點左右，麻醉科醫生到咗幫賴媽做無痛分娩，賴爸就要出去迴避一下。賴媽喺生之前睇過唔同嘅影片，有啲人話打咗無痛，生產過程都唔痛，最痛係打無痛嗰一下，所以賴媽打無痛嘅時候都好緊張。不過麻醉科醫生同助產士都好好，會好仔細咁同賴媽解釋過程喺點，亦都好幫賴媽擺好姿勢。喺打無痛嘅過程中，助產士亦都不斷講鼓勵說話，令到賴媽唔好咁緊張，而醫生亦都好溫柔咁敍述每一個動作（因為無痛係打喺脊柱位置，打嘅途中係睇唔到嘅）。大概15分鐘左右，賴媽就打咗無痛分娩，過程都無賴媽想像中咁痛。

打完無痛之後，麻醉科醫生都係時不時入嚟檢查下賴媽嘅情況，睇下麻醉藥落得夠唔夠。因為賴媽媽都係第一次打無痛，唔肯定咩先係夠，所以醫生會用唔同方法去確認，例如用冰去掂下賴媽腰以下嘅部份，睇下有無感覺。如果仲有感覺嘅就會再加麻醉藥份量，令到賴媽係待產中都唔會痛。

———

接下來個幾個鐘就好似去咗酒店staycation 咁，係到煲劇啦，lunchtime就嗌room service，賴媽食咗個三文治，而賴爸就食咗個牛扒意粉。賴爸話好好食。咁一路等生得嘅時候，都會有助產士，醫生，麻醉科醫生入嚟幫手檢查，調教麻醉藥份量，亦會留意催生藥嘅劑量。度數一路開嘅時候，都冇感覺到痛楚。

去到同一日16:45左右，助產士就開始嗌準備啦，啲護士就開始set場。17:00左右醫生嚟到都換好衫準備接生，助產士都一路係到教呼吸方法，賴爸一直係隔離陪住賴媽。陪賴媽生產過程有1位醫生，5-6位護士。賴媽就係最後半個鐘感受到痛楚，再配合用力呼吸，最後用咗大約30-45分鐘，賴B就成功出生啦。出生個刻，醫生即刻將賴B放係賴媽心口。

跟住護士幫我哋影合照，然後就開始幫賴B檢查，帶尿片。一切正常後，賴爸就幫賴B剪臍帶，影合照，檢查姓別。同時醫生就幫賴媽處理傷口。

大約15分鐘後賴爸就已經可以手抱賴B小公主啦。過多30分鐘左右，確保賴媽穩定之後，就去咗病房，賴B就要去兒科醫生到打針同埋詳細檢查。

我哋book嘅係半私家房，有一個廁所兩張病床，但因為隔籬床冇人，所以可以容許好多人都係病房。當時賴爸賴媽屋企人都可以喺病房探賴媽。上咗病房之後，就嗌咗一個好清淡嘅醫院餐，而賴爸又食返晏晝嗰個牛扒。過咗一陣，賴皮小公主都檢查完，可以入病房陪我哋啦。兒科醫生都會入嚟簡單講吓BB嘅健康情況，同埋提到BB要喺二十四小時內屙一次尿同埋屙一次屎。賴媽可以嘗試餵母乳同埋抱吓BB，期間都有好多護士會入嚟教我哋點樣去照顧BB，點樣換尿片BB，餵母乳等等。嗰晚賴爸同屋企人留到10點幾就番屋企啦，而BB都交咗比護士照顧，賴媽可以瞓返好嘅，掛住BB就可以再嗌護士叫BB過嚟，爆喊就叫護士照顧返佢。就係咁過咗第一晚啦。